APPLICATION TRACKING SYSTEM - ATS

#الحلقه_الاولى

حابب اشارك معاكم المقال ده عن ال Application Tracking system -ATS
كنت اتناقشت مع اكتر من زميل هنا فى انهم شايفين انه غير فعال
و الواقع انى متفهمه تماما قد ايه ممكن يكون محبط ان نظام  يرفض السى ڤى قبل حتى ما انسان يشوفه
خصوصا اننا  ناس كتير جدا عندها خبرات جبارة بمعنى الكلمه و ميعرفوش اوى يعملوا سى ڤى تبين ده
و اكيد ده ظلم ليهم بس فى سوق العمل حاليا بقى واجب انهم يتعلموا يتعاملو مع ده
لان حتى لو شركة معندهاش ATS عندهم نظام الكترونى تانى للفرتله فى الاخر هتبقى نفس الفكرة
مثلا هنا فى لينكد ان و هو مصدر كبير للسيڤيهات بستخدم نظام فلتره بال Keywords ولازم نفهم ان كلها لعبة keywords  ازاى اقدر استخدم المفردات اللى عندى و مطلوبه فى سوق العمل
متفهمه تماما احباط الناس و يمكن انا نفسى واجهت ده فى شركات قبل ما اقعد افهم و ادور ليه بترفض مع انى اعرف اعمل الشغلانه دى كويس اوى و ده نفس السؤال اللى بسمعه دايما من زمايلانا بقى  لازم علينا نواكب التغيرات اللى بتحصل
و منخليش نظام الكترونى يستبعد حد شاطر و خبرة عظيمة لمجرد انه موصلوش المعلومة صح
هكمل اكتر عن الموضوع ده عشان نساعد بعض نتغلب على النظام ده تماما
اتمنى المقال يفيدكم زى ما استفدت منه

#الحلقه_الثانية

يا مساء الفل
تانى و تالت هفضل اتكلم عن ال  ATS
انا قتلت الموضوع ده بحثا
و فى الواقع يا صديقى العزيز مهما قعدنا نقول محدش بيستخدمه ايه الظلم ده او انه مش لكل الوظايف ده مش هيغير حاجة من انه فعلا بيستخدم و كتير و منتشر
ادينى عقلك كده طيب هل تعتقد ان شركة بيجيلها الآلاف المتقدمين لكل وظيفة هتفلترها يدويا ؟!
اكيد مستحيل
اسمع منى خليك مواكب للتطور اللى بيحصل حواليك يا هتفضل تقول ليه السى ڤى بتترفض حتى من قبل حتى حد يكلمنى
الATS نظام الكترونى بقى منتشر و  حتى اللى مش عارفين يعملوه فى شركاتهم ممكن يستخدموا اى سوفت ويير للفلتره
يا عزيزى ده حتى هنا فى لينكدان بفلتر كده
متفهمه ان التغيير مش حاجة سهله و ان اصلا عمل السى ڤى حاجة تقيله على قلبنا كلنا حتى انا نفسى
لازم نفهم ان الفكرة انك بتدى النظام معلومات يعرف يقرأها و كل ما المعلومات الصح زادت الScore بتاعك هيزيد و السى ڤى هتتقبل
نعتبرها لعبة و ليها قوانين زى كل حاجة فى الدنيا عرفت قوانينها و فهمتها هتعرف تلعبها صح و تبقى محترف
يمكن الموضوع لسه مش مفهوم اوى بس مع بعض هنفك طلاسم النظام ده وحده وحده و سوف نهزم هذا النظام اللعين سويا يا اصدقائى
ده الموقع اللى بيبن ال score و كمان بشوف حاجات تانية
www.jobscan.com
لقيت ده كمان و جربته شوفوه كده
https://lnkd.in/dNh5m7v4
انا دورت على إجابة اهم سؤال انهى score هيتقبل؟
لقيت الإجابة فى مقال على لينكد ان بيقولك ايه
من اول 80% انت كده عديت و فى انسان كائن حى هيشوف السى ڤى بتاعتك انت كده من الاحرار يا على
من اول 79% دى خانة فوت علينا بكره اللى هو هنحتفظ بالسى ڤى و حظ سعيد
من اول 20%  بتبقى موهبة تستحق الدفن و السى ڤى بتروح فى الوبا انت كده  فى الشلاحات مع الاسف
انا نفسى اترعبت الصراحة بس على مين هنغلبه يعنى هنغلبه

#الحلقه_الثالثة

لسه مكملين موضوع الATS ده لحد ما نشوف اخرتها
ماهو مش معقول نسيب نظام الكترونى يطلع روحنا كده
انا جربت المواقع اللى بتقيم الscore بتاع السى ڤى بالنسبة لل ATS
و بلا فخر ال Score بتاعى طلع ٤٠٪؜  تخيل!!
اه والله زمبئولك كده
لييييه بقى الظلمة ادونى هذا الscore اللى هفضل بيه فى دكة الاحتياطى
هقولك يا عزيزى
كل معلومات الاتصال تليفون ايميل كله كله مستخدمه قبلها رموز السيستم معرفش يقرأها
فى keywords مستخدمتها قديمة مثلا زى انى مخدتش بالى و كاتبهRecruitment بدل Talent acquisition  تقريبا الكلمة الاولى بقت عيب
قيس على كده حبه keywords
بعض الخطوط اللى مكنتش مفهومه للنظام
مهارات ناقصة مع انها عندى بس انا مبحبش اشكر فى نفسى يعنى
المصيبة بقى طريقة كتابات التواريخ و عناوين الشغل و الشركات
و ده معناه ان السيستم مفهمش مدة الشغل بتاعتى قد ايه
اختصار لدراسة معينة و هو بسلامته مبيفهمش الاختصارات لازم تكلمه مباشر راجل لراجل
بعد كل ده قام طبعا جبروا بخاطرى عشان اتش ار و ادونى ٤٠٪؜
انا متكسفتش اقول الscore بتاعى عشان تعرفوا انه عادى جدا انك جايب رقم قليل و محتاج تظبطه فا متحبطش كلنا هذا الرجل
ده غير ان احنا اهل يا سيد متقولش كده
عايزة اقولك يا عزيزى ان اما تبقى هتتجن و تقول ازاااااى ازاى اترفضت ده انا حريف فى الشغلانة دى
بيبقى الباشا الATS مش شايفك كويس
و احنا مع بعض هنخليه غصب عنه يشوفنا و نعدى منه
مناقصش غير حته روبوت كمان يعطلنا
الموقع اللى جربته www.jobscan.com
و بجرب حاجات تانيه و ازاى نعدل الناقص
ملحوظه مهمه لازم تضيف وصف وظيفى مظبوط متجيش تضيف الوصف الوظيفى اللى عندك فى السى ڤى و تقول الله جبت ٩٠٪؜
تعديل: بالنسبة للسؤال بتاع هو ازاى بيقولى ان الcontact information  بتاعتى ناقصه
الموضوع ده كان من ضمن الحاجات اللى ناقصه عندى و عند كتير منكم مع اننا كاتبينها
قالك ايه بقى
انك متخليش الcontact information  محطوطه  header or footer و اصلا متسخدمهمش و كمان متحطش اى علامات ولا نقط ولا فواصل و تحط رقم تليفونك بكود البلد و كمان متحطش المعلومات جوه جدول
يومكم جميل زيكم

#الحلقه_الرابعة

لسه مكملين بحث فى ال ATS و بحاول اجمع كل الاسئلة و ارد عليها
فى سؤال من زميل فاضل بيقول:
طيب هو انا كل شغلانة هغير السى ڤى؟!
السؤال ده اتكرر كتير و بيبقى رد منطقى  انك تقول لا اكيد الATS ده اى كلام خلينى زى منا
طيب واحدة واحدة كده  الscore  بيتحدد ازاى الاول؟
فى اكتر من قسم فى الوصف الوظيفى اللى مسئول التوظيف مدخله فى بيانات النظام
البيانات الشخصية: هتفضل ثابته هتغيرها ليه
التعليم كذلك
نيجى للوصف الوظيفى زى ما كل فترة فى المجتمع بيبقى فى مجموعة مفردات بنستخدمها كلنا
كمان لكل شغلانة فى keywords  لا يمكن يخلو منها وصف وظيفى و بتبقى مصطلحات معروفة و كل الناس بتكتبها فى اعلانات التوظيف
شطارتك انك تستخدم اكبر عدد منها
اذا مش هتغير كمان ده ولا حاجة
نيجى للTechnical skills اكيد المطلوب لكل وظيفه هيفضل ثابت
و كذلك المهارات الشخصية
جزء الانجازات اكيد اكيد مش هتغير انجازاتك بس هو بالنسباله الجزء ده موجود
و هكذا يا صديقى
حاجة كمان لاحظتها ان حد يجى يقولى انا طلعت 90% ابص على السى ڤى الاقى فى حاجة غلط
بيكون عمل ايه بقى
دخل للنظام نفس الوصف الوظيفى و المهارات اللى اصلا هو كاتبها فى السى ڤى فا طبيعى هتاخد Score عالى لا سحر ولا شعوذة
انا عارفه ان الموضوع يخض شوية و فى ناس مش مقتنعة بيه
بس احب اقولك ان ده سبب كبير فى الايميل بتاع و الله يبنى احنا شوفنا السى ڤى و انت حلو و جميل بس انت تستاهل احسن مننا فا هنخلى السى ڤى عندنا و شكرا
و هيفضل الموقف يتكرر
ان شاء الله مع بعض هنبسطه واحده واحده و نتغلب عليه
انا حطيت الروبوت ده فى دماغى و يا انا يا هو
اى حد عنده اسئلة يا اهلا بيه انا كمان بذاكر و بجرب عشان انقلكم تجربة مفيدة فا باب النقاش اكيد مفتوح و كلنا بنتعلم من بعض
يومكم جميل زيكم يا حلوين.

منقول من المهندس كريم سعيد

CV #ATS #INTERVIEW #JOB#